اسلام آباد : کورونا سے متاثرہ شہروں میں پشاور پہلے اور کراچی دوسرے نمبر پر

کورونا کے مثبت کیسز کی شرح پشاور میں 19.65 فیصد، کراچی 17.73 فیصد اور حیدرآباد میں 16.32 فیصد ہے

اسلام آباد (نمائندہ خصوصی)  ملک میں کورونا سے سب سے زیادہ متاثرہ شہروں میں پشاور پہلے اور کراچی دوسرے نمبر پر ہے۔

ورونا صورتحال پر نیشنل کمانڈ اینڈ آپریشن سینٹر (این سی او سی) کا اسد عمر کی زیر صدارت اجلاس ہوا جس میں وبا سے بچاؤ کے حفاظتی اقدامات اور ایس او پیز پر عملدرآمد کا جائزہ لیا گیا۔ این سی او سی کو بریفنگ میں بتایا گیا کہ ملک میں کورونا کے مثبت کیسز کی اوسط شرح 7.20 فیصد ہے جبکہ پشاور، کراچی اور حیدرآباد سب سے زیادہ متاثرہ شہروں میں شامل ہیں۔ مثبت کیسز کی سب سے زیادہ شرح پشاور میں 19.65 فیصد، کراچی 17.73 فیصد اور حیدرآباد میں 16.32 فیصد ہے، آزاد کشمیر 10.79 ، بلوچستان 6.41، گلگت بلتستان میں مثبت کیسز کی شرح 04.81 فیصد ہے۔ وفاقی وزیرمنصوبہ بندی اسدعمر نے کہا کہ عوام کا تحفظ ہماری اہم ذمہ داری ہے، کورونا سے بچنے کیلئے ایس او پیز پر عملدرآمد یقینی بنانا ہے۔ نیشنل کمانڈ اینڈ آپریشن سینٹر (این سی او سی) کے جاری کردہ اعداد و شمار کے مطابق گزشتہ 24 گھنٹوں کے دوران 3 ہزار 113 افراد کورونا وائرس کا شکار ہوئے اور صرف ایک دن میں مزید 54 اموات سامنے آئیں۔ پنجاب میں کورونا کے مریضوں کی تعداد 1 لاکھ 17ہزار 160، سندھ میں 1 لاکھ 68 ہزار 783، خیبرپختونخواہ میں 46 ہزار 281، بلوچستان میں 17 ہزار 8 جب کہ اسلام آباد میں 28 ہزار 980 تک پہنچ گئی ہے۔

اس خبر پر اپنی رائے کا اظہار کریں

اپنا تبصرہ بھیجیں