70

لاہور : حکومتی میڈیکل بورڈ نے نواز شریف کی صحت سے متعلق رپورٹ مسترد کردی

لاہور: حکومتی میڈیکل بورڈ نے نواز شریف کی میڈیکل رپورٹس نامکمل قرار دے کر مسترد کردیا۔ ڈیلی جستجو ڈاٹ کام اور جستجو نیوز ڈاٹ ٹٰ وی کے مطابق لندن میں مقیم مسلم لیگ (ن) کے قائد اور سابق وزیراعظم نواز شریف کے ڈاکٹر کی رپورٹ ایک بار پھر مسترد کردی گئی، اور حکومتی میڈیکل بورڈ نے نواز شریف کی میڈیکل رپورٹس کو نامکمل قرار دے دیا۔ میڈیکل بورڈ کا مؤقف ہے کہ امریکی نژاد ڈاکٹر فیاض شاول کی رپورٹس مکمل نہیں ہیں، ڈاکٹرفیاض شاول نے صرف نواز شریف کی صحت پر تحریر بھیجی ہے، کسی میڈیکل ادارے یا لیبارٹری کی میڈیکل رپورٹس ساتھ موجود نہیں۔ میڈیکل بورڈ نے محکمہ صحت پنجاب کو نواز شریف کی رپورٹس پر تحریری طور پر آگاہ کردیا ہے۔ 9 رکنی میڈیکل بورڈ نے پہلے بھی نواز شریف کی رپورٹس نامکمل قرار دی تھیں۔ واضح رہے کہ نواز شریف کی 3 صفحات پر مشتمل طبی رپورٹ لاہور ہائیکورٹ میں جمع کروائی گئی تھی، جس کے مطابق ڈاکٹرز نے نواز شریف کو سفر کرنے سے روک دیا ہے، اور بتایا گیا ہے کہ کلثوم نواز کی وفات کے بعد سابق وزیراعظم زیادہ دباؤ میں ہیں، اور اگر وہ علاج کے بغیر پاکستان گئے تو ان کی حالت بگڑ سکتی ہے، ذہنی دباؤ کے ماحول میں ان کی بیماری مزید بگڑ سکتی ہے۔ دوسری جانب اٹارنی جنرل پاکستان نے سابق وزیراعظم کی میڈیکل رپورٹ کا جائزہ لینے کے لیے پنجاب حکومت کو خط لکھا تھا، جس میں کہا گیا تھا کہ پنجاب حکومت کا قائم کردہ میڈیکل بورڈ رپورٹ کا جائزہ لے، پنجاب حکومت کے میڈیکل بورڈ کی رائے آنے کے بعد ہی مزید پیش رفت کی جائے گی۔

اس خبر پر اپنی رائے کا اظہار کریں